لا .... للإرهاب ..... إصحو يا شباب

لا .... للإرهاب ..... إصحو يا شباب

ـــــــــــــــــــــــــــــــــــــــــــــــــــــــــ

مكدبش عليكو ... كنت قاعد في قاعدة أنس مع (العمده ) و شوية محششيشين ... قصدي مسؤلين

كان قاعد الصاوي بيه و الريس شادي و عم  حسين

في لمه ما بتتجمعش غير كل فان و فين

في وسط زحمة الكلام و الضحك و النكت و الناس مبسوطين

سألني الواد عوضين

وهو مشغول في رص الحجرين

كان لسه فايق ...... لكن الباقي كانو ضايعين

وقال إيه رأيك يا سي الأستاذ في اللي حاصل بين...... النصاره و المسلمين

رديت عليه إنتا بتتكلم في السياسة يا عوضين ..... يا ليلة سووووده....... لأ يا ليلة طين

إنتا عاوز مني مني إيه يا عوضين .... ده أنا لسه صغير و عاوز أخش دنيا و أكون من المتجوزين

قالي و هو مفزوع .... ليه يا سي الاستاذ

قولتله ... لا أستاذ و الا نيله .... دي قصة طويلة

لا يا واد إنتا عاوز تجرجرني في الكلام و أقولك .....  إن إحنا بنضرب علي قفانا و ساكتين .... لأ مش هقول

عاوزني أقولك .... إننا عارفين مين اللي ضربنا ومغمضين .... لأ مش هقول

عاوزني أقولك .... إن اللي ماتو في تفجيرات إسكندرية  دول إخوانا و مافيش فرق بين نصاره و مسلمين .... لأ مش هقول

عاوزني أقولك .... إن في ناس بتستغل الازمات ديا و تولع الدنيا و إحنا مش ناقصين ..... لأ مش هقول

عاوزني أقولك .... و ألا أقولك عن الناس اللي مش فاهمه حاجه و بتعبر بهمجيه دو شوية مجانين ... لأ مش هقول

عاوزني أقولك .... أقولك إيه و الا إيه بلاش نزود و نقول يا ريت اللي جري و ياريت ما كان .... لأ مش هقول

عاوزني أقولك .... بلاش لنشربها علي أروحنا سادة .... كفايه و بزيادة .... ونلم اللسان .... لأ مش هقول

تعالي هنا يا واد يا عوضين .... إنتا منهم و ألا إيه

 هه قول ..... إعترف .... إنتا من اللي مدينها صرمه

 وياكش تولع.... تمشي و تعدي ... إديها جزمة

والا إنتا مين .... !!!؟

رد عليا و قالي ... يا سي الاستاذ

أنا لمن الواعين .... والا المتعلمين ..... والا الضايعين

انا من طبقة المطحونين .... اللي بتروح في الرجلين

اللي كلامهم غير مسموع ..... و قلبهم موجوع

بقولك إيه ياسي الاستاذ .... من غير كتر كلام

لو اتكلمت من هنا للصبح ... اهو كله كلام

والناس دي مش هتصحي دول غراقانين في الأحلام

وطقة في عقلي فكره

قوم بسرعه يا واد يا عوضين .... وهاتلي جردل مايه

والا أقولك إجري بسرعه يا واد و هات نشووووووء

عشان نصحي الناس دي و عشان نفوووووء

وتسلم يا ريس من كل سووووووء

ما هو زي ما قال الريس ..... منتخب مصر كويس .... ومادام المنتخب كويس .... يبقي الشعب مهيص

لا للإرهاب .... إصحوا يا شباب

أصل الأرهاب بلا دين و لا مله

وفتحو عينكو شويه يا خونا

وماتدوش فرصه لا لفتنه و الا لفرقه

أصلها لما تولع مش هتحرق حد غيرنا

بقلم ... وتصميم الصورة

عبدالرحمن

January 6, 2011